Ístak reisir Vaðölduver fyrir sjö milljarða

Landsvirkjun hefur samið við verktakafyrirtækið Ístak hf. um ýmis mannvirki fyrir Vaðölduver, þar sem fyrsta vindorkuver landsins rís. Upphæð samningsins nemur rúmum 6,8 milljörðum króna. 

Fram kemur í tilkynningu Landsvirkjunar að reiknað sé með að Ístak hefjist handa í núna í maí og verkinu ljúki sumarið 2027. 

Alls bárust sjö tilboð í verkið og var tilboð Ístaks metið hagstæðast að teknu tilliti til samtölu fjárhæðar þess og tilboðs í kolefniskostnað. 

Undir samninginn fellur bygging á járnbentum og steinsteyptum undirstöðum fyrir 28 vindmyllur, sem og gerð kranastæða fyrir uppsetningu vindmyllanna, ásamt allri jarðvinnu.

Þá reisir Ístak um 1000 m² safnstöð á svæðinu, steinsteypta byggingu sem nýtt verður fyrir ýmsan búnað og verkstæði. Safnstöðin verður tengd við tengivirki Landsnets. Þá þurfi að leggja töluvert af lögnum á svæðinu og grafa fyrir þeim, ganga frá malarplönum og vatns- og fráveitu. 

Vindmyllur gangsettar á næsta ári

Landsvirkjun samdi í nóvember sl. við þýska fyrirtækið Enercon um kaup, uppsetningu og rekstur á vindmyllunum 28, sem reistar verða í Vaðölduveri. Fyrri helmingur þeirra verður gangsettur á næsta ári og seinni hlutinn árið 2027.

• Blogga um frétt