Skatturinn innsiglaði Kastrup vegna skulda

Búið er að innsigla veitingastaðinn Kastrup á Hverfisgötu vegna skulda við Skattinn.

DV greindi fyrst frá. 

Fram kemur í fréttinni að lögreglumenn og fulltrúi Ríkisskattsjóra hafi mætt á staðinn klukkan 13.30 og vísað fólki út sem sat að snæðingi. Í kjölfarið hafi veitingastaðurinn verið innsiglaður.

mbl.is hefur ekki náð í Jón Mýrdal Harðarson, eiganda Kastrup, en Vísir hefur eftir honum að fyrirtækið skuldi skatt. Aftur á móti sé fyrirtækið ekki gjaldþrota heldur gangi reksturinn vel og skuldi engum öðrum.

Hann segist hafa tök á að greiða skuldina og hyggst ganga frá málinu á mánudaginn.

„Og halda svo ótrauður áfram. Mér bauðst að semja um skuldina en ég náði ekki í neinn. Hræðilegt að þurfa að loka. Tvö hundruð manns bókaðir um helgina. Þetta setur mig í mjög erfiða stöðu að missa allar þær tekjur,“ sagði hann við Vísi. 

• Blogga um frétt