Bergey kaupir sögufrægt skrifstofuhúsnæði 

Fasteignafélagið Bergey hefur fest kaup á 2.460 fermetra skrifstofuhúsnæði að Digranesvegi 5 í Kópavogi. Húsið, sem var reist árið 1974, hefur hýst margvíslegar opinberar og einkareknar stofnanir, þar á meðal Reiknistofu Bankanna, Útvegsbanka Íslands og Greiningar- og ráðgjafarstöð ríkisins.

Byggingin er hönnuð af Gísla Halldórssyni og Teiknistofunni Ármúla 6, sem komu að mörgum þekktum opinberum byggingum hér á landi. Meðal annarra verka Gísla eru Tollhúsið í Reykjavík, Laugardalshöllin og Hótel Loftleiðir.

Kemur þetta fram í tilkynningu félagsins og þar er haft eftir Magnúsi Berg Magnússyni, stjórnarformanni Bergeyjar: 

„Við erum spennt að taka við þessari vel staðsettu viðbót í eignasafn Bergeyjar sem jafnframt verður okkar fyrsta fjárfesting í Kópavogi." 

„Húsið býr yfir ríkri sögu og hefur alla burði til að gegna mikilvægu hlutverki í þeirri umbreytingu sem nú er hafin á miðbæ Kópavogs.“

Bergey er fasteignafélag sem sérhæfir sig í þróun og fjárfestingu í atvinnuhúsnæði. Eignasafn félagsins er nú rúmlega 13.000 fermetrar og spannar verslunar- og þjónustuhúsnæði, hótel og iðnaðarhús á höfuðborgarsvæðinu.

Meðal verkefna eru umbreyting gömlu Mjólkurstöðvarinnar við Snorrabraut og nýleg kaup á Austurbæjarbíói.

Að félaginu standa fjárfestarnir Magnús Berg Magnússon, Torfi G. Yngvason og Jónas Pétur Ólason.

• Blogga um frétt