Tímasetning sölunnar fín

Alexander Jensen Hjálmarsson, greinandi hjá AKKUR – Greining og ráðgjöf, segir að tímasetning sölunnar sé fín eins og staðan sé núna. Hlutirnir geti þó breyst fljótt.

„Tímasetningin er góð bæði upp á að fá inn erlenda aðila og innlendir aðilar hafa verið að búa sig undir söluna í einhvern tíma. Það er nóg til af fjármunum á hliðarlínunni auk þess sem fyrirtækin hafa verið að skila töluverðum fjármunum til hluthafa,“ segir Alexander.

Hann bætir við að það geti verið tækifæri í þeim markaðsaðstæðum sem hafa verið undanfarið sem einkennast af lækkunum, sveiflum og óvissu.

„Það geta verið tækifæri í því að markaðurinn hafi ekki verið góður, hlutabréfaverð hefur lækkað sem getur þýtt meiri tækifæri til lengri tíma fyrir fjárfesta,“ segir Alexander.

Spurður hvernig sú leið sem stjórnvöld hafa valið að fara þegar kemur að útboðinu horfi við honum, segir Alexander að leiðin sé fín ef ætlunin er að fara í almennt útboð.

„Það er meiri kostnaður og hærra flækjustig að fara í almennt útboð heldur en hraðaða tilboðsleið sem valin var síðast. C-bókin sem hefur verið kynnt býður þó upp á ýmsa möguleika. Með henni er hægt að fá stærri aðila að borðinu,“ segir Alexander.