Aukning á pottasölu kom á óvart

Sala á pottum jókst gríðarlega í faraldrinum bæði hjá NormX og í öðrum pottaverslunum, en hefur dregist saman síðan þá og haldist stöðug, eins og Orri útskýrir í samtali við Morgunblaðið. „Árleg sala margfaldaðist í faraldrinum, en hún hefur róast síðan og náð ákveðnu jafnvægi. Nú er mikil aukning sem kemur pínu á óvart.“

Svipað veðurfar

NormX steypir alla sína potta í verksmiðju félagsins í Vogum á Vatnsleysuströnd, að rafmagnspottum undanskildum. „Við byrjuðum að selja rafmagnspotta í fyrra. Við flytjum þá inn frá Finnlandi. Salan hefur farið rólega af stað. Þetta er gæðaframleiðandi en kannski í dýrari kantinum miðað við það sem flutt er inn til landsins frá Kína. Svo virðist sem fólk horfi minna í gæðin í þessari tegund heitra potta en spái þeim mun meira í verðið. Við völdum framleiðandann því við vildum geta selt þessa vöru með góðri samvisku. Finnar búa við svipað veðurfar og við og vita við hverju má búast.“

Á síðasta ári hóf NormX, sem selt hefur heita potta síðan 1982, innreið sína á sánumarkaðinn en mikið gufubaðsæði hefur gripið landann síðustu misseri. NormX vildi vera með í þeirri bylgju, að sögn Orra.

„Við bjóðum upp á sánur frá Saunasell í Eistlandi. Eistar eru mikil gufubaðsþjóð rétt eins og Finnar. Saunasell er einn stærsti sánuframleiðandinn í landinu og hefur verið lengi að,“ segir Orri.

Sjö stærðir

Hann segir eistnesku sánurnar koma í mörgum mismunandi stærðum og gerðum. „Það er hægt að fá þær með einu rými en einnig með hvíldar- eða búningsrými fyrir framan, m.a. Vinsælasta gerðin heitir Patio og er hún fáanleg í sjö mismunandi stærðum. Svo erum við með mjög flotta sánu sem heitir Round Cube. Hún fékk „Red Dot“-hönnunarverðlaun á síðasta ári sem þau hjá Saunasell eru skiljanlega mjög stolt af.“

Steinkarfa býr til gufu

En ekki er nóg að eiga sánuklefann. Nauðsynlegt er að hafa góðan ofn til að skvetta vatni á og búa þannig til funheita gufu. „Við erum með ofna frá Huum í Eistlandi. Þeir sérhæfa sig í flottum öðruvísi ofnum. Um er að ræða steinkörfur úr ryðfríu stáli. Þú sérð steinana upp úr, niður úr. Þetta er mjög flott hönnun sem fer mjög vel inni í sánunni,“ útskýrir Orri.

Spurður um verð segir Orri að sem dæmi kosti ódýrasta Patio-sánan 1.150 þúsund. „Það er XXS-útgáfan. Við erum einnig með sánutunnur í mörgum stærðum.“ Allar sánurnar eru úr svokölluðum Termo-við sem er hitameðhöndlaður og hentar einstaklega vel í sánuklefa.

Aðspurður segir Orri að það taki sánuna um 45 mínútur að hitna. Hægt er að tengja hana við þráðlaust net og setja í gang í appi á leið heim úr vinnu. „Þetta er svipaður tími og það tekur að láta renna í pottinn,“ segir Orri að lokum.