EVE Online er sérstakt hagkerfi

Tölvuáhuginn kviknaði snemma hjá Hilmari. Þegar hann var níu ára gamall rakst hann á auglýsingu í blaði um Sinclair ZX Spectrum-tölvu sem kostaði 6.450 krónur í Kaupfélagi Hafnarfjarðar. Hann ákvað að safna fyrir vélinni sjálfur og tók að sér að bera út Morgunblaðið í heimabæ sínum, Garðabænum. Það reyndist krefjandi verkefni, sérstaklega yfir vetrarmánuðina, en eftir nokkra mánuði náði hann markmiðinu. Móðir hans keyrði hann í Kaupfélagið þar sem tölvan var keypt. Heima tengdi hann hana við svarthvítt sjónvarp foreldra sinna og hóf að forrita leiki með hjálp tölvublaða og gúmmítakkanna á vélinni.

„Þessi frumstæða reynsla, miðað við nútímatækni, lagði grunninn að ævistarfi mínu. Ég hef í rauninni verið að búa til tölvuleiki allar götur síðan,“ segir Hilmar.

Áhugi hans á að vinna hjá CCP tengdist meðal annars því að fyrirtækið var stofnað af fólki sem áður hafði unnið saman hjá Oz og hafði skýra sýn um að þróa tölvuleiki. CCP gaf einnig út fyrsta tölvuleikinn sem var alfarið þróaður á Íslandi, sem hafði mikið að segja fyrir Hilmar og sýn hans á íslenska leikjaiðnaðinn.

Um helgina stóð CCP fyrir árlegri ráðstefnu sinni sem nú fór fram í Hörpunni. Undanfarin ár höfðu ráðstefnurnar verið haldnar í Laugardalshöll, en síðast var hún haldin í Hörpunni árið 2018 þegar fimmtán ára afmæli EVE Online var fagnað. Nú var tilefnið 21 árs afmæli leiksins og um tvö þúsund manns mættu á ráðstefnuna sem stóð yfir þrjá daga. Margir komu fyrr og dvöldu lengur, enda orðin hefð meðal samfélagsins að hittast í tengslum við viðburðinn.

Hilmar lýsir því að ráðstefnan sé vettvangur fyrir CCP til að tilkynna um nýjungar í leiknum, kynna framtíðaráform og sýna nýja leiki í þróun.

„En það sem flestir gestir kunna mest að meta er tækifærið til að hitta aðra spilara sem þeir hafa myndað vináttu við í gegnum leikinn – sumir í áratugi – en oft aldrei hitt í eigin persónu. Fólk kemur víða að og margir líta á þessa samveru sem hátíð, þar sem vinir og félagar koma saman, ýmist í fyrsta skipti eða árlega. Það er þessi mannlegi þáttur – samskiptin og tengslin sem myndast í gegnum leikinn – sem helst situr eftir þegar ráðstefnunni lýkur,“ lýsir Hilmar.

Fólk hafi áhuga á þróun hagkerfisins

Einn af þeim fyrirlestrum sem vöktu sérstaka athygli á nýafstaðinni ráðstefnu CCP var fyrirlestur um efnahagskerfi EVE Online, gjarnan kallað EVEconomics. Þar var farið yfir hvernig innra hagkerfi leiksins þróast og hvaða stefna og straumar einkenna það á hverjum tíma.

Hilmar útskýrir að EVE Online sé frábrugðinn flestum öðrum tölvuleikjum, þar sem allir spilarar deila sama leikheimi í stað þess að dreifast á mismunandi netþjóna. Þetta hafi áhrif á upplifunina og styrki samfélagsvitund meðal notenda. Leikurinn snýst að miklu leyti um viðskipti og samvinnu, þar sem spilarar stofna fyrirtæki og reyna að fá aðra til liðs við sig með viðskiptaáætlunum sem oft fela í sér metnað, heimsvaldastefnu – eða einfaldlega bardaga og eyðileggingu.

Um helgina stóð CCP fyrir árlegri ráðstefnu sinni sem nú fór fram í Hörpunni. Nú var tilefnið 21 árs afmæli leiksins og um tvö þúsund manns mættu á ráðstefnuna sem stóð yfir þrjá daga. Ljósmynd/Aðsend

Í þessu samhengi hefur fólk sterkan áhuga á þróun hagkerfisins í leiknum, og CCP heldur árlega ítarlega yfirferð um þessi mál. Þar eru kynnt gögn um hráefnavinnslu, verðbreytingar og hreyfingar innan efnahagskerfisins. Sérstaklega var fjallað um námuvinnslu – eða „geimsteinanámugröft“ eins og Hilmar orðar það – sem er burðarás margra leikverkefna í EVE. Gestir sitja fyrirlestrana með glósubækur í hendi og skrá niður upplýsingar um markaðsþróun og ný gögn sem eru einnig birt á ársfjórðungsfresti í skýrslunni Economic Report.

Auk hefðbundins efnahagsleiks í EVE vinnur CCP að nýjum leik sem ber heitið Frontiers, þar sem rafmynt gegnir lykilhlutverki sem gjaldmiðill. Fyrirtækið fékk Stefán Þórarinsson, sem áður starfaði hjá Seðlabanka Íslands, til liðs við sig sem leiðsögumann í þróun efnahagsumhverfis leiksins. Hann kynnti gögn og kerfislýsingar á ráðstefnunni og útskýrði hvernig nýja rafmyntin er hugsuð utan gjaldeyrishafta. Það kallar á bæði lagalega og tæknilega umgjörð, sem CCP hefur lagt mikla vinnu í að útfæra. Þannig eru höftin, sem voru raunveruleiki Íslendinga eftir hrunið, tekin af, í sýndarheimi.

Undanfarið hefur margt verið á döfinni hjá CCP. Í lok nóvember kom út nýr farsímaleikur, EVE Galaxy Conquest, sem fyrirtækið þróaði að öllu leyti sjálft. Hann fylgir eftir eldri leik, EVE Echoes, sem var unninn í samstarfi við kínverska leikjaframleiðandann NetEase. Sá leikur nýtti vörumerki og bar með sér andrúmsloft EVE, en NetEase sá um þróun og dreifingu. EVE Galaxy Conquest er hins vegar alfarið CCP-verkefni og hefur opnað dyr að nýjum mörkuðum, með tilheyrandi lærdómi og möguleikum. Í maí kemur út ný uppfærsla við leikinn, sú fjórða í röðinni, með ýmsum nýjungum fyrir spilara.

Á Fanfest-ráðstefnunni fengu gestir einnig að prófa skotleik sem þróaður er í útibúi CCP í London. Leikurinn nefnist EVE Vanguard og er væntanlegur á markað. Hann var kynntur í Hörpunni, streymt víða og settur á samfélagsmiðla í kjölfarið. Þá var einnig hægt að prófa annan leik, EVE Frontier, sem nýtir rafmynt sem gjaldmiðil og er nú á frumstigum í þróun. Tíu þúsund spilendur hafa fengið aðgang að honum í gegnum sérstaka forgangsskráningu undir trúnaðarsamningi (NDA).