Arnar ráðinn forstöðumaður hjá OK

Arnar S. Gunnarsson hefur verið ráðinn forstöðumaður Öryggislausna OK sem er nýtt svið innan tæknifyrirtækisins.

Segir í tilkynningu að Arnar komi til OK frá Controlant þar sem hann starfaði í fjögur ár og bar meðal annars ábyrgð á öryggis- og tæknimálum félagsins. Áður starfaði hann sem innviðahönnuður hjá Arion banka og þar áður var hann tæknistjóri hjá Origo. 

Hann er með MBA-gráðu frá Háskólanum í Reykjavík auk fjölda alþjóðlegra vottana í öryggis- og tæknimálum.

„Það er bæði spennandi og krefjandi verkefni að leiða nýtt svið Öryggislausna OK. Við ætlum að bjóða upp á öfluga ráðgjöf og byggja upp enn öflugra framboð í öryggislausnum. Við ætlum að veita þessum mikilvæga málaflokki aukið vægi til að styðja enn betur við okkar viðskiptavini og mæta auknum kröfum á heimsvísu,“ segir Arnar í tilkynningunni. 

Hann hefur starfað við tækni- og öryggismál í yfir 20 ár og þekkir því vel til í þessum geira. „Ég hef sérhæft mig í stjórnun, ráðgjöf og úttektum í þessum málaflokki og hef unnið með flestum stærstu fyrirtækjum landsins. Í yfir áratug hef ég haldið námskeið og fyrirlestra á alþjóðavettvangi til að hjálpa fólki og fyrirtækjum að skilja enn betur þetta landslag og þær áhættur sem geta leynst þarna,“ segir Arnar enn fremur.

• Blogga um frétt