Eigendaskipti hjá Héðni hf.

Héðinn eignarhaldsfélag ehf. hefur keypt 93% hlut í Héðni hf. Kaupendur eru Guðmundur Sveinsson, fyrrverandi stjórnarformaður og framkvæmdastjóri félagsins, Halldór Lárusson, núverandi stjórnarformaður, og Eðvarð Ingi Björgvinsson framkvæmdastjóri, sem hafa allir starfað lengi innan fyrirtækisins. Guðmundur átti áður 24% hlut.

Kemur þetta fram í tilkynningu, þar kemur jafnframt fram að seljendur eru RGI ehf. (í eigu þriggja lykilstarfsmanna Héðins) og þrír afkomendur annars stofnanda félagsins, Markúsar Ívarssonar. Eftir viðskiptin er félagið áfram að tveimur þriðju í eigu afkomenda Markúsar.

Héðinn hf., sem var stofnað árið 1922, þjónustar sjávarútveg og iðnað. Höfuðstöðvar félagsins eru í Hafnarfirði og starfa þar um 150 manns. Samkvæmt tilkynningu nam velta félagsins árið 2024 um 10 milljörðum króna og hagnaður eftir skatta um einum milljarði.

Arion banki var ráðgjafi kaupenda og sá um fjármögnun viðskiptanna, að því er segir í tilkynningunni.

• Blogga um frétt