Starbucks velur Fastus

Starbucks hefur valið íslenska fyrirtækið Fastus sem samstarfsaðila sinn vegna þjónustu og viðhalds á kaffivélum og eldhústækjum á nýjum kaffihúsum Starbucks hér á landi, samkvæmt tilkynningu frá Fastus. Fyrstu staðir Starbucks á Íslandi munu opna á næstu vikum.

„Það er okkur mikill heiður að hafa verið valin sem samstarfsaðili Starbucks,“ segir Ástrós Kristinsdóttir, markaðsstjóri Fastus, í tilkynningunni. „Tæknideild okkar mun sinna þjónustu og viðhaldi á búnaði fyrir staði þeirra á Íslandi. Samstarfið byggir á fagmennsku, áreiðanleika og sérþekkingu sem falla vel að kröfum og væntingum einu virtasta kaffihúsamerki heims.“

Í tilkynningunni kemur einnig fram að sérhæfð þjálfun tæknimanna Fastus hafi farið fram fyrir páska til að tryggja fyrsta flokks þjónustu frá fyrsta degi. Fastus þjónustar fyrirtæki og fagaðila í heilbrigðis- og veitingageiranum með búnaði og rekstrarvörum. Tæknideild félagsins telur 50 sérþjálfaða starfsmenn sem sinna uppsetningum, viðhaldi og reglulegum gæðaheimsóknum.

• Blogga um frétt