Gera ráð fyrir óbreyttum vöxtum

Ólíklegt er að peningastefnunefnd Seðlabanka Íslands lækki stýrivexti á fundi sínum á morgun. Í greiningu Landsbankans, sem birt var í síðustu viku, segir að gert sé ráð fyrir hléi á vaxtalækkunarferlinu þar sem verðbólga jókst umfram væntingar í apríl og verðbólguvæntingar hafa almennt haldist háar.

Stýrivextir standa nú í 7,75% og raunstýrivextir í 3,58%. Nefndin hefur lækkað vexti á síðustu fjórum fundum, en greining bankans bendir á að taumhaldið sé enn nauðsynlegt þar sem verðbólguþrýstingur hafi ekki dvínað frá síðasta fundi í mars.

Þrátt fyrir háa vexti hefur efnahagslífið reynst þrautseigt. Kortavelta hefur aukist jafnt og þétt og veltan á íbúðamarkaði er enn talsverð. Þá hefur vinnumarkaðurinn haldist stöðugur.

„Við teljum þó að nefndin komist að þeirri niðurstöðu að skynsamlegra sé að staldra við í þetta skiptið og eiga þá frekar inni meiri vaxtalækkun í ágúst,“ segir í greiningu Landsbankans.
mj@mbl.is