Musk forstjóri nema hann láti lífið

Elon Musk hefur ítrekað að hann muni áfram gegna stöðu forstjóra Tesla næstu fimm árin, þrátt fyrir erfiðan rekstur félagsins og gagnrýni vegna umfangsmikillar þátttöku hans í stjórnmálaverkefnum á vegum Hvíta hússins.

Í viðtali á Bloomberg á þriðjudag var Musk spurður hvort hann væri staðráðinn í að halda áfram sem forstjóri Tesla. Svar hans var afdráttarlaust já en forstjórinn bætti þó við að það væri ákveðinn fyrirvari á þessu öllu, helst ef hann myndi láta lífið.

Musk hefur undanfarið verið leiðandi fyrir „Department of Government Efficiency“ (DOGE), stofnun á vegum ríkisstjórnar Donalds Trumps til að hreinsa til í ríkisrekstri. Þátttaka hans þar hefur verið gagnrýnd. Á sama tíma hafa afhendingar frá Tesla dregist saman um 13% á fyrsta ársfjórðungi, sem er mesta lækkun í sögu fyrirtækisins.

Musk hefur þó ekki of miklar áhyggjur, enda muni sjálfkeyrandi bílar og vélmennið Optimus taka við sem helsta tekjulind félagsins til framtíðar.