Húsasmiðjan leitar að forstjóra

Rekstur Húsasmiðjunnar reyndist stöðugur á árinu 2024, þrátt fyrir hátt vaxtastig og áframhaldandi erfiðleika á byggingamarkaði. Velta félagsins nam 25,8 milljörðum króna og dróst saman um 2,9% frá fyrra ári. Hagnaður eftir skatta nam 343 milljónum króna og lækkaði um 576 milljónir frá árinu 2023.

Kemur þetta fram í tilkynningu félagsins og vísað til þess að rekja megi samdráttinn að stórum hluta til hás vaxtastigs og lóðaskorts sem hamlaði nýframkvæmdum á árinu. 

Árni Stefánsson, sem gegnt hefur starfi forstjóra síðastliðin ár, lét af störfum í byrjun maí. Ráðningarferli vegna nýs forstjóra stendur yfir og er það í höndum ráðningarfyrirtækisins Hagvangs. Magnús Guðmann Jónsson, framkvæmdastjóri rekstrarsviðs, gegnir starfi forstjóra tímabundið.

• Blogga um frétt