Viðskipti | Morgunblaðið | 12.6.2025 | 8:30 | Uppfært 15:38

Meginstarfsemi Play til Möltu og Litáen

Í fjárfestakynningu kemur fram að upphaflegt rekstrarlíkan Play, með meginstarfsemi á Íslandi, hafi verið ósjálfbært. mbl.is/Eyþór

Veruleg stefnubreyting blasir við í rekstri flugfélagsins Play verði yfirtökutilboð BBL 212 hf. samþykkt. Yfirtökuaðilarnir, undir forystu Einars Ernis Ólafssonar og Elíasar Skúla Skúlasonar, sem stefna að því að leggja fram tilboð í allt hlutafé Play að því gefnu að þeir nái að fjármagna verkefnið, kynntu í fjárfestakynningu að félagið muni hverfa frá núverandi rekstrarlíkani, með því að hætta flugi til Norður-Ameríku, færa hluta rekstrarins til Möltu og Litáen og einblína á leiguflug og sólarlandaferðir.

Í framlögðum gögnum í tengslum við yfirtökutilboðið er gert ráð fyrir að félagið verði rekið annars vegar sem Play Europe og hins vegar sem Play Iceland. Þetta félag fær nýtt flugrekstrarleyfi á Möltu og stýrir þaðan flugrekstri sem áður var á Íslandi. Play Iceland verður minni eining með fjórar vélar sem sinna flugi frá Keflavík innan Evrópu.

Samkvæmt gögnunum verður öllum flugferðum til Norður-Ameríku hætt í lok október 2025. Félagið hyggst í staðinn leigja út sex af tíu flugvélum sínum til erlendra aðila, þar á meðal til evrópskra flugfélaga og samstarfsaðila í Kósovó.

Draga úr flækjustigi

Kynning fjárfestanna dregur fram að millilandaflug frá Íslandi hafi ekki skilað ásættanlegri arðsemi, en samhliða hafi leiguflug og sólarlandaferðir í Evrópu skilað jákvæðri afkomu. Áætlað er að áherslan á leigu og Evrópuflug skili betri nýtingu og hærri framlegð.

Fram kemur í fjárfestakynningunni að upphaflegt rekstrarlíkan Play, með meginstarfsemi á Íslandi, hafi verið ósjálfbært. Með flutningi til Möltu og Litáen er ætlunin að lækka launakostnað, auka sveigjanleika og færa félagið nær helstu mörkuðum. Þetta er talið nauðsynlegur viðsnúningur í rekstri og flug til Bandaríkjanna hefur verið sérstaklega erfitt félaginu.

Í kynningu kemur fram að verið sé að draga úr flækjustigi og færa reksturinn þangað sem hann nýtist best. Ísland muni áfram gegna mikilvægu hlutverki, en með breyttum formerkjum.

Viljayfirlýsing um samvinnu og möguleg kaup

Áherslan á íslenskt vörumerki og millilandaflug frá Keflavík víkur fyrir alþjóðlegri nálgun með lágmörkun kostnaðar. Þó er mikilvægt að hafa í huga að samkvæmt upplýsingum fjárfestanna verða áhafnir vélanna, sem byggja rekstur sinn á flugi frá Keflavík, íslenskar og vísað er til þess að nýbúið sé að semja við starfsmenn.

Fram kemur í kynningu að þegar nýtt rekstrarlíkan er að fullu komið til framkvæmda, þarf hver flugvél að skila um það bil 2 milljónum dala árlega til að standa undir föstum kostnaði. Gert er ráð fyrir eldsneytisverði upp á 850 dollara á tonn (sem samsvarar 725 dollurum á tonn að frádregnum gjöldum frá birgjum, flugvöllum og öðrum þriðju aðilum). Núverandi markaðsverð er 675,8 dollarar á tonn (staða 6. júní 2025).

Athygli vekur í fjárfestakynningu að viljayfirlýsing (MoU) liggi fyrir við meðalstórt evrópskt flugfélag sem felur í sér samvinnu. Umrætt flugfélag rekur áætlunar- og leiguflug til 90 áfangastaða í 30 löndum í Evrópu, Norður-Afríku, við Miðjarðarhafið og víðar, með flugflota sem telur 70 vélar. Þar mun Play veita leiguþjónustu og vinna við undirbúning á áætlunarflugi á evrópskum sólarlandamarkaði.

Í viljayfirlýsingunni kemur einnig fram að flugfélagið hafi lýst áhuga á að eignast allt að 49% hlut í Fly Play Europe.