Kúrekar og keppnishestar

Horseday nýtir gervigreind til að greina gangtegundir hesta og veita notendum betri innsýn í þjálfun, velferð og árangur. Forritið nýtur nú þegar töluverðrar útbreiðslu meðal eigenda íslenskra hesta bæði hérlendis og erlendis.

„Hugmyndin fæddist fyrir rúmum fimm árum í gegnum reynslu okkar af hestamennsku,“ segir Oddur. „Ég ólst upp á Hvoli í Ölfusi. Fjölskyldan rak hestabú í 30 ár og ég ólst upp á hestbaki.“

Fjölskyldunni hafi fundist vanta yfirsýn yfir það umtalsverða utanumhald sem fylgir hestum. Velferð dýranna sé þeim efst í huga og hvernig megi tryggja hana samhliða hámarksafköstum. Á þremur árum hefur forritið þróast mikið. Í því má finna niðurstöður keppna og forritið tengist gagnagrunni WorldFengs og dregur þar með inn ættfræðiupplýsingar um hesta. „Og úr verður stafrænt samfélag hestafólks,“ segir Oddur.