Árstaktur íbúðaverðs lækkar

Bergþóra Baldursdóttir, hagfræðingur hjá Greiningu Íslandsbanka, segir að ljóst sé að meira jafnvægi sé að komast á íbúðamarkaðinn.

„Framboðið er komið inn en eftirspurnin er enn til staðar. Við sjáum að það hafa verið miklar verðsveiflur á sérbýlum og voru þær helsta ástæðan fyrir lækkun í maí,“ segir Bergþóra.

Spurð hvernig hún meti horfurnar varðandi íbúðaverð segir Bergþóra að íbúðamarkaður sé að leita í eðlilegra horf og að búast megi við að árstakturinn muni halda áfram að minnka á næstu mánuðum.

„Það voru miklar hækkanir á árstaktinum í fyrra sökum Grindavíkuráhrifanna. Þegar þeir mánuðir detta út úr mælingunni má búast við að takturinn lækki, við teljum að hóflegar nafnverðshækkanir séu í kortunum en ekki er ólíklegt að sjá verðlækkanir einstaka mánuði líkt og gerðist nú í maí,“ segir Bergþóra.

Í nýlegri þjóðhagsspá Greiningar Íslandsbanka er því spáð að íbúðaverð hækki í ár um 6,2% á milli ára. Í greiningu Íslandsbanka segir að á næsta ári muni vera svipað um að litast á íbúðamarkaði og gerir bankinn ráð fyrir 5,3% hækkun milli ára. Breytingin yfir árin tvö er svipuð en vegna þess að mælikvarðinn er milli ársmeðaltala munar 0,9 prósentustigum á árunum tveimur.

„Þegar líða tekur á spátímann teljum við að minni verðbólga og lægri vextir muni ýta undir eftirspurn og árið 2027 hækki íbúðaverð um 6,4% milli ára. Gangi spáin eftir munu raunverðshækkanir vera nokkuð hóflegar í samanburði við hækkanir síðustu ára,“ segir í greiningu bankans.