Lakers metið á 1.250 milljarða

Jerry Buss keypti félagið árið 1979 fyrir 67,5 milljónir dala og lagði hann grunninn að sigursælustu árum liðsins og tíu meistaratitlum þess. Buss-fjölskyldan heldur eftir 15% hlut og Jeanie Buss, dóttir Jerrys, mun áfram gegna stöðu forseta liðsins innan NBA, sem tryggir áframhaldandi áhrif fjölskyldunnar í rekstri félagsins.

Viðskiptin tryggja Lakers sess á meðal dýrustu íþróttafélaga heims, en aðeins tvö NBA-lið eru metin hærra; Golden State Warriors á 9,4 milljarða dala og New York Knicks á 7,5 milljarða dala.

Borið saman við aðrar íþróttir má nefna knattspyrnu þar sem spænska liðið Real Madrid er metið hæst, á um 6,75 milljarða dala. Í bandarískum fótbolta eru Dallas Cowboys metnir á um 10,1 milljarð dala, sem er álíka og söluviði Lakers. Í hafnabolta eru New York Yankees verðmætastir, metnir á um 7,6 milljarða dala.

Salan á Lakers endurspeglar þróun í atvinnuíþróttum þar sem fjárfestingarsjóðir, tæknifjárfestar og stórir einkaaðilar sækja sífellt meira inn í íþróttageirann með von um stöðugan vöxt í virði, tekjum og alþjóðlegum áhrifum. Það sem áður var rekstur knúinn áfram af ástríðu einstakra eigenda og fjölskyldna, er nú í vaxandi mæli hluti af viðskiptaneti alþjóðlegra fjárfesta.