Regluverkið hannað fyrir stærra umhverfi

Regluverkið á íslenskum fjármálamarkaði er hannað fyrir mun stærra markaðsumhverfi sem gerir það að verkum að fjármálaþjónusta á Íslandi er dýr miðað við það sem gengur og gerist annars staðar. Þetta segir Haraldur Þórðarson forstjóri Skaga en hann er gestur í viðskiptahluta Dagmála þessa vikuna.

„Ísland er lítill markaður, okkar fjármálamarkaður er tiltölulega lítill. Því held ég að samþjöppun á fjármálamarkaði geti verið af hinu góða til að auka hagkvæmni, auka skilvirkni, sem ætti að skila sér og vera til hagsbóta fyrir alla, þar með talið neytendur, sem ég held að sé mikilvægt,“ segir Haraldur.

Hann telur ósennilegt að það verði hreyfingar á fjármálamarkaði án þess að Skagi fái sæti við borðið.

„Ég tel að Skagi sé í einstakri stöðu. Við erum nýr áskorandi í fjármálalandslaginu. Ég held að samþjöppun á fjármálamarkaði hér heima muni skila sér í tækifærum fyrir Skaga,“ segir Haraldur.

Áskrifendur Morgunblaðsins geta horft á þáttinn í heild sinni hér:

Skagi í einstakri stöðu á markaðnum

Haraldur Þórðarson forstjóri Skaga var gestur í viðskiptahluta Dagmála. mbl.is/María Matthíasdóttir