Óvissa dregur úr fjárfestingum

„Við höfum klárlega orðið vör við þetta. Mörgum verkefnum hefur annaðhvort verið slegið á frest eða hreinlega fallið niður,“ segir Óskar Pétursson, framkvæmdastjóri tæknifyrirtækisins Klaka, sem sérhæfir sig í sjálfvirknivæðingu fyrir sjávarútveg. Hann segir haustið líta út fyrir að verða rólegra en ella og að fyrirtæki þurfi í auknum mæli að færa fókus sinn annað vegna þessarar þróunar.

Hagkvæmt en slegið af

Óskar nefnir dæmi um verkefni sem Klaki hefur haft lengi í undirbúningi og búið er að leggja mikla hönnun og þróun í sem hætt hafi verið við. „Þetta var verkefni sem var augljóslega hagkvæmt fyrir viðkomandi fyrirtæki til lengri tíma litið, en áhyggjur af rekstrarumhverfinu og auknum álögum hafa orðið til þess að ekki er ráðist í fjárfestinguna,“ segir Óskar.

Að hans mati getur þessi þróun grafið undan samkeppnishæfni íslensks sjávarútvegs á alþjóðamarkaði.

„Þetta er ekki flókið. Sjávarútvegurinn er eina alvörumagnframleiðslugreinin sem við höfum á Íslandi. Hún verður einfaldlega ekki samkeppnishæf erlendis nema framleiðslan sé eins sjálfvirk og mögulegt er. Ef fyrirtækin hafa ekki tök á því að sjálfvirknivæða framleiðsluna sína verða þau ekki samkeppnishæf,“ segir Óskar.

Hann vekur jafnframt athygli á þeirri spurningu hvort nægilega vel hafi verið metið hvaða áhrif auknar álögur og skattahækkanir á sjávarútveg geta haft á verðmætasköpun í landinu.