Áhrif af falli Play á hagvöxt verða takmörkuð

„Við erum aðeins svartsýnni en Seðlabankinn á þróun atvinnuleysis,“ segir Kári.

Í ágústspá bankans var gert ráð fyrir 4,0% atvinnuleysi á þessu ári og að það myndi minnka á næsta ári, en Arion greining sér frekar áframhaldandi aukningu.

Áhrifin á hagvöxt lítil

Í nýútgefinni Hagspá Arion kemur fram að á næsta ári sé útlit fyrir að innflutningur dragist saman, sem skýrist fyrst og fremst af minni fjárfestingu áðurnefndra gagnavera, og að utanríkisverslun leggist á sveif með einkaneyslunni.

„Þó útlit sé fyrir að einkaneyslan verði dráttarklár hagvaxtar út spátímann eru horfurnar þokukenndari en oft áður, þar sem verðbólgan hefur reynst treg í taumi og vextir því haldist háir lengur en áður var spáð. Áhrif þessa á innlenda eftirspurn eru ekki enn komin fram að fullu, en sýnileg merki kólnunar er að finna bæði á vinnumarkaði og húsnæðismarkaði,“ segir í Hagspánni.

Hvað varðar hagvöxt telur Kári að gjaldþrot Play hafi lítil áhrif. Félagið hafi þegar dregið saman seglin og aðeins átt fjórar vélar að fljúga til og frá Keflavíkurflugvelli í vetur.

„Play var meira að flytja Íslendinga út heldur en að flytja ferðamenn til landsins. Því eru áhrifin á landsframleiðslu fremur lítil,“ segir hann.

Arion greining spáir engu að síður hógværum hagvexti á þessu ári, einungis 0,9%, samanborið við 2,3% í spá Seðlabankans. Munurinn skýrist fyrst og fremst af nýjum landsframleiðslutölum fyrir annan ársfjórðung sem birtust eftir að bankinn gaf út sína spá.

Í heildina telur Arion greining að íslenskt hagkerfi muni halda áfram að vaxa næstu tvö ár, í takt við spár Seðlabankans, en að vinnumarkaðurinn standi frammi fyrir meiri áskorunum en áður var talið.