Viðskipti | mbl | 8.10.2025 | 12:26

Milljarðaáhrif vegna falls Play

Gjaldþrot flugfélagsins Play hf. mun samkvæmt mati Fjármála- og efnahagsráðuneytisins hafa takmörkuð áhrif á þjóðarbúskapinn og ríkisfjármál árin 2025 og 2026. Morgunblaðið/Eggert

Gjaldþrot flugfélagsins Play hf. mun samkvæmt mati Fjármála- og efnahagsráðuneytisins hafa takmörkuð áhrif á þjóðarbúskapinn og ríkisfjármál árin 2025 og 2026. Í minnisblaði sem ráðuneytið hefur sent fjárlaganefnd Alþingis kemur fram að áhrifin séu fyrst og fremst fólgin í auknum útgjöldum vegna atvinnuleysis og mögulegum kröfum á Ábyrgðarsjóð launa.

Heildaráhrif á afkomu ríkissjóðs eru metin á 1–2 milljarða króna árið 2025 og 1–3 milljarða árið 2026.

Play hætti rekstri í byrjun október og misstu um 400 starfsmenn vinnuna. Þótt atvinnuleysi kunni að aukast um 0,2 prósentustig, er ekki gert ráð fyrir verulegum þjóðhagslegum áhrifum. Umsvif Play voru minni en helmingur af þeim sem Wow hafði þegar það félag fór í þrot árið 2019.

Ýmis áhrif

Áætlað er að áhrif á tekjur ríkissjóðs vegna launatengdra skatta og gjalda nemi um 900 milljónum króna árið 2026, en áhrifin gætu orðið minni ef starfsfólk fær fljótt önnur störf. Áhrif á gistináttagjald og virðisaukaskatt eru talin óveruleg þar sem Play hafði dregið úr flugi til útlanda og einblínt á innanlandsmarkað.

Útgjöld Atvinnuleysistryggingasjóðs vegna gjaldþrotsins gætu numið allt að 697 milljónum króna á síðustu mánuðum ársins 2025, en óvissa ríkir um kostnað árið 2026. Ef 400 einstaklingar verða á atvinnuleysisbótum allt árið gæti kostnaðurinn numið um 1,8 milljörðum króna, þó það sé talið ólíklegt.

Ábyrgðarsjóður launa gæti einnig þurft að greiða út bætur vegna vangoldinna launa og réttinda. Miðað við sviðsmyndir sem ráðuneytið leggur fram gæti heildarkrafa starfsmanna numið á bilinu 200–800 milljónir króna.

Heildaráhrif á afkomu ríkissjóðs eru metin á 1–2 milljarða króna árið 2025 og 1–3 milljarða árið 2026, sem fyrr segir. Ráðuneytið telur ekki tilefni til sértækra aðgerða vegna gjaldþrotsins, en uppfærsla á forsendum fjárlagafrumvarpsins fyrir 2026 mun taka mið af nýrri þjóðhagsspá Hagstofunnar sem væntanleg er síðar í október.