Nánast aldrei séð viðlíka vöxt

Fjárfestingar í óskráðum félögum

Forstjórinn segir að þó að í Bretlandi sé lánastarfsemin langumfangsmest hafi bresku dótturfélagi Kviku, Kvika Ltd., gengið mjög vel í fjárfestingum í óskráðum fyrirtækjum. „Við settum upp sex milljarða framtakssjóð í byrjun þessa árs og erum að sjá mikinn vöxt í þeirri starfsemi. Þarna erum við að fjárfesta með breskum aðilum í breskum fyrirtækjum. Við tökum einnig þátt sjálf að einhverju marki.“

Sprakk út á skömmum tíma

Spurður um gott dæmi um vel heppnaða fjárfestingu nefnir Ármann net-tískuvöruframleiðandann Disturbia. „Við fjárfestum í þessu félagi fyrir tveimur árum. Disturbia selur vörur um allan heim. Rekstrarhagnaður fyrirtækisins hefur á þessum tveimur árum farið úr um 500 milljónum íslenskra króna upp í tæplega tvo milljarða. Við höfum nánast aldrei séð viðlíka vöxt. Þetta er það sem getur gerst í smásölu á netinu. Hún getur sprungið út á skömmum tíma. Þetta er ólíkt því sem áður var, þegar menn voru háðir því að setja upp búðir við verslanagötur, sem gat tekið óratíma.“

Stofnað 2002

Ármann segir til gamans að Disturbia hafi upphaflega verið stofnað af breskum hjónum árið 2002 til að selja myndskreytta stuttermaboli. „Svo líða fimmtán ár. Árið 2020 var veltan einungis milljón sterlingspund á ári. Þá skipta þau um kúrs. Eiginkona sér tækifæri í að leggja áherslu á kvenmannsklæðnað og fyrirtækið tekur flugið.“