AstraZeneca semur við Hvíta húsið

Greinin birtist fyrst í Morgunblaðinu 13. október.

Breski lyfjaframleiðandinn AstraZeneca hefur fallist á að lækka verð á sumum lyfjum sínum á Bandaríkjamarkaði í skiptum fyrir undanþágu frá tollum. Er þetta liður í áætlun Hvíta hússins um að lækka heilbrigðisútgjöld Bandaríkjamanna, en í júlí sendi Donald Trump bréf til sautján stærstu lyfjaframleiðenda heims og fór fram á að þeir lækkuðu hjá sér verð.

Pfizer reið á vaðið fyrir röskri viku með svipuðum samningi og AstraZeneca hefur núna gert, sem undanskilur félagið frá tollum í þrjú ár í skiptum fyrir verulegan afslátt af listaverði lyfja fyrirtækisins. Bæði ætla fyrirtækin að fjárfesta í framleiðslu og lyfjaþróun í Bandaríkjunum; AstraZeneca fyrir 50 milljarða dala en Pfizer fyrir 70 milljarða.