Létta þarf framkvæmdina

Horfa til Norðurlanda

Fram kemur að á Íslandi séu veltumörk tilkynningarskyldra samruna fimmfalt lægri en annars staðar á Norðurlöndunum. Það valdi því að mun fleiri samrunar þurfa að fara í gegnum lögbundið rannsóknarferli hérlendis.

Sjöfalt fleiri samrunamál hafa á undanförnum árum farið í ítarlegri rannsókn, svokallaðan fasa II, á Íslandi en annars staðar á Norðurlöndunum.

Þá voru íhlutanir samkeppniseftirlitsins í samruna, þ.e. skilyrði eða ógilding, fimmfalt fleiri en íhlutanir samkeppnisyfirvalda annarra Norðurlanda á sama tímabili.

Af öllum íhlutunum samkeppnisyfirvalda innan EES á tímabilinu 2015-2023 áttu 7,6% þeirra sér stað á Íslandi.

Ísland í 42. sæti

Samkeppniseftirlitið rekur lestina meðal eftirlitsstofnana þegar kemur að leiðbeiningum og Ísland er í 42. sæti hvað viðkemur skilvirkni samkeppnislagaumhverfisins, en hinar Norðurlandaþjóðirnar sitja í 10. sæti að jafnaði.

„Viðskiptaráð leggur til hækkun veltumarka til samræmis við Norðurlönd, kallheimild verði afmörkuð, leiðbeiningarskylda lögfest, meðalhófs verði gætt í gagnabeiðnum, skýrari ramma um forviðræður og lögfestingu skilyrða og rökstuðningsskyldu vegna tilfærslu mála til frekari rannsóknar,“ segir í greiningunni.