Um 37% íslenskra tölva enn með Windows 10

Í dag hættir Microsoft formlega að styðja Windows 10 stýrikerfið. Mælingar á Íslandi benda til allt að 37% tölva séu með Windows 10.

Í tilkynningu frá OK vegna þessa er haft eftir Arnari S. Gunnarssyni, öryggisstjóra:

,,Það sem þetta þýðir er að Microsoft er hætt að veita Windows 10 stuðning og gefur ekki lengur út uppfærslur. Windows 10 er orðið 10 ára gamalt stýrikerfi og bara í apríl á þessu ári uppgötvuðust 17 öryggisveikleikar í stýrikerfinu en það eru einmitt þeir sem verður hætt að lagfæra. Slíkir veikleikar geta leyft hökkurum að komast yfir gögn, lykilorð eða jafnvel stjórn á tölvum. Tölvurnar sjálfar halda áfram að virka en frá og með morgundeginum munu ekki berast fleiri uppfærslur frá Microsoft.”

Arnar mælir með samkvæmt tilkynningunni að uppfæra í Windows 11. ,,Þetta er ráðlegasta leiðin og tryggir áframhaldandi öryggi og samhæfni.“

• Blogga um frétt