Hið opinbera færir kostnaðinn á einkaaðila

Deloitte Legal tekur í sama streng og varar við því að fjölgun uppgjörstímabila myndi hafa gríðarleg áhrif á fjölda rekstraraðila. Slíkar breytingar gætu kallað á fjölgun stöðugilda í bókhaldsdeildum fyrirtækja og hjá fagaðilum, sem þegar glíma við álag við skil á virðisaukaskatti.

Viðbótarkostnaðurinn verður ekki einungis fyrir fyrirtæki heldur einnig Skattinn sjálfan. Fjölgun uppgjörstímabila leiðir óhjákvæmilega til fleiri leiðréttingaskýrslna og krefst aukinna afkasta hjá Skattinum. KPMG og ECIT benda á að afgreiðslutími leiðréttingaskýrslna sé þegar of langur og fari oft út fyrir lögbundinn frest. Þau telja ólíklegt að Skatturinn ráði við aukið umfang.

Sérstaklega áhugavert er að sjá að Deloitte Legal bendir á að hinar boðuðu breytingar muni hafa áhrif á sjóðstreymi fyrirtækja og geti leitt til hærri fjármagnskostnaðar. Þar er bent á að lægri fjármagnskostnaður ríkissjóðs muni að líkindum endurspeglast í hærri fjármagnskostnaði rekstraraðila.

FA tekur sömuleiðis skýrt fram að með styttingu uppgjörstímabila og greiðslufrests sé fjármagnskostnaður í raun færður frá ríkissjóði til fyrirtækja. Í umsögn félagsins segir að breytingarnar muni í mörgum tilvikum þýða að fyrirtæki þurfi að standa skil á virðisaukaskatti áður en þau hafi fengið greitt fyrir vörur sínar. Slíkt geti þýtt aukna þörf á skammtímafjármögnun á hærri vöxtum en ríkissjóður greiðir.

FA bendir jafnframt á að breytingarnar geti haft neikvæð samkeppnisleg áhrif. Með styttri greiðslufresti sé hætta á að stærri smásölukeðjur, sem hafa betri samningsstöðu, hagnist á kostnað minni fyrirtækja.

Hvatt er til þess að fjármála- og efnahagsráðuneytið endurskoði áformin áður en þau verða að lögum.