Þegar fjárfest fyrir 200 ma.kr. í starfseminni

„Við höfum aðeins verið örfá ár með fyrsta lyfið á markaði. Mestur hluti tímans hefur farið í að byggja upp aðstöðuna, þróunargetu og að klára þróun fyrstu lyfjanna. Í dag erum við með tvö lyf á markaði en það breytist nú hratt. Við ætlum að bæta við næstu þremur lyfjum fyrir árslok 2025 og því fjórða árið 2026. Þar að auki eru spennandi ný lyf í farvatninu sem munu koma á markað í framhaldinu.“

Róbert segir að félagið einbeiti sér að því að geta þjónustað sjúklinga og tryggt að vöxturinn gangi farsællega fyrir sig.

„Við erum að byggja félagið myndarlega upp, styrkja innviði þess og sjá til þess að við getum annað eftirspurn þegar fleiri lyf koma á markað. Mikil áhersla er líka á að gera nýja samninga við markaðsaðila úti um allan heim,“ segir hann.

Spurður um framtíðarsýn sína til lengri tíma litið svarar Róbert að stefnan sé sett á að vera í fararbroddi í heiminum á sviði líftæknilyfja.

„Við stefnum að því að vera leiðandi félag í okkar geira. Miðað við innviði okkar og þau lyf sem við erum með í þróun í dag erum við í mjög góðri stöðu til að ná því markmiði innan tíu ára. Ég hef mikla trú á því.“