Spurður hvernig aðgerðapakkinn horfi við honum segir Gunnar að í honum séu bæði jákvæðir og neikvæðir þættir. „Aðgerðapakkinn slær mig fljótt á litið þannig að hann ýti undir eftirspurn til skamms tíma,“ segir Gunnar. Hann bætir við að til langs tíma sé jákvætt að sjá áform um nýja byggð sem eigi að rísa í Úlfarsárdal og að ríkið hyggist selja eignir.

Varðandi líkur á vaxtalækkunum á næstunni segir Gunnar að hann telji að líklegt sé að Seðlabankinn taki sér tíma í að meta stöðuna.

„Eins og staðan er núna finnst mér líklegt að Seðlabankinn vilji bíða og sjá og meta áhrifin af öllu kringum vaxtamálið, sjá niðurstöður fleiri dómsmála, og auðvitað sjá verðbólguna hjaðna hraðar og því sé nóvemberlækkun ólíklegri, sér í lagi í ljósi verðbólgutalnanna.“

Gunnar bendir þó á að líkur séu á því að vaxtalækkanir á næsta ári verði hraðar um leið og þær byrja.

„Það virðist vera vilji stjórnvalda að draga úr vægi verðtryggðra neytendalána, slíkt ætti að vinna með Seðlabankanum og gæti kallað á lægri stýrivexti en ella. En auðvitað þarf verðbólgan og verðbólguhorfur að batna, það er nú stóra málið á endanum,“ segir Gunnar að lokum.