Veislan orðin gjaldþrota

Skiptastjóri Veislunnar, Ólafur Björnsson, segir í samtali við Morgunblaðið að enn hafi engir sýnt áhuga á þrotabúinu. Lokauppboð verður 20. nóvember nk.

Hann segir að búið sé að lýsa kröfum upp á á annað hundrað milljónir króna. Þá segir hann að 300 milljóna króna veðskuldir hvíli á húsnæðinu. Arion banki á fyrsta veðrétt.

Verðmetið á 175 m.kr.

Ólafur segir að húsnæðið hafi verið verðmetið á 175 milljónir og innréttingar og tæki á fimmtán milljónir. Verðið sé því samtals 190 milljónir fyrir áhugasama.

Ólafur segir að húsnæðið hafi aðeins látið á sjá og þörf sé á einhverjum fjármunum inn í reksturinn til að uppfæra búnað og aðstöðu.

Spurður um ástæðu gjaldþrotsins segir Ólafur að bransinn sé greinilega frekar erfiður um þessar mundir og mögulega hafi menn keypt fyrirtækið of dýru verði og tekið of há lán.

Ólafur á von á því að bankinn leysi til sín þrotabúið ef ekki tekst að selja.