Áreiðanleikakönnunum að ljúka og samtöl við Samkeppniseftirlitið hafin

Kvika banki hf. hefur birt árshlutauppgjör sitt fyrir þriðja ársfjórðung og fyrstu níu mánuði ársins 2025. Afkoman endurspeglar styrk í kjarnastarfsemi bankans, með vaxandi vaxtatekjum og útlánum, þrátt fyrir áskoranir á innlendum fjármálamörkuðum.

Samkvæmt tilkynningu nam hagnaður fyrir skatta á þriðja ársfjórðungi um 1.969 milljónum króna, sem er 8,6% aukning frá sama tímabili í fyrra. Hagnaður af áframhaldandi starfsemi eftir skatta var 1.472 milljónir króna, sem er 5,3% hækkun.

Vaxtatekjur jukust um 21,6% og námu 2.953 milljónum króna, en vaxtamunur hækkaði í 4,0%. Þóknanatekjur hækkuðu lítillega um 1,2%, en aðrar rekstrartekjur lækkuðu um 136 milljónir króna. Rekstrarkostnaður hækkaði um 16,9% og nam 2.740 milljónum króna, að hluta vegna breytinga á þjónustu við TM tryggingar.

Útlán til viðskiptavina jukust um 30,7% frá áramótum og námu 196 milljörðum króna, en innlán voru 178 milljarðar. Eigið fé samstæðunnar lækkaði í 68 milljarða króna, meðal annars vegna arðgreiðslna og hlutabréfaendurkaupa. 

Á fyrstu níu mánuðum ársins nam hagnaður fyrir skatta af áframhaldandi starfsemi 4.695 milljónum króna. Leiðrétt fyrir einskiptisliðum var hagnaðurinn 5.583 milljónir króna, sem er 32,4% hækkun. Hagnaður eftir skatta var 3.097 milljónir króna.

Sérstaklega er þess getið að rekstur Kviku í Bretlandi hafi skilað sínum besta ársfjórðungi til þessa, með 563 milljóna króna hagnaði. Fram kemur að bæði lánastarfsemi og fjárfestingar hafi gengið vel.

Samrunaferlið við Arion banka heldur áfram, þar sem áreiðanleikakannanir eru að ljúka og samtöl við Samkeppniseftirlitið eru hafin. Kvika gerir ráð fyrir að ferlið taki nokkurn tíma.

Ármann Þorvaldsson, forstjóri Kviku, segir afkomuna endurspegla styrk í kjarnastarfsemi bankans. Útlánavöxtur og stöðugur vaxtamunur hafi verið drifkraftar árangursins, auk sterkrar lausafjárstöðu og áhættudreifingar.

• Blogga um frétt