Eins og margt annað í hinum alþjóðlega heimi þá lesum við að viðskiptaátök Bandaríkjanna og Kínverja séu Donald Trump Bandaríkjaforseta að kenna. Vissulega er það svo að upphaf átakanna má rekja til ákvarðanna Trump. Í maí síðastliðnum birtist listi með 140 kröfum sem ríkisstjórn Trump tók saman í fyrstu fundalotunni við Kínverja. Þegar listinn er skoðaður sést að Bandaríkjamenn hafa nokkuð til síns máls. Kínverjar hafa haft nánast óheftan aðgang að verðmætasta markaði í heimi í mörg ár en hafa um leið taflið og hindrað aðgengi erlendra fyrirtækja inn á kínverska markaðinn. Á lista Trump voru atriði á borð við að kínversk stjórnvöld samþykki með hraði umsóknir Mastercard og Visa um að selja greiðslukortaþjónustu á innanlandsmarkaði, og að greitt verði fyrir því að JPMorgan fái að eiga meirihlutann í kínversku verðbréfafyrirtæki. Það er með ólíkindum hvernig Kínverjar hafa náð að loka af eigin fjármálamarkað sem sést til dæmis af því að sívaxandi fjöldi kínverska ferðamanna á í vandræðum að greiða rafrænt nema boðið sé sérstaklega upp á slíka þjónustu með samtengingu við kínverska greiðslumiðlun. Fyrir vikið greiða Kínverjar sem mest fyrir þjónustu fyrirfram eða nota reiðufé. Fyrr á árinu tók til starfa hér á Íslandi fyrirtæki sem reynir að koma til móts við Kínverjar og leigja út posa sem taka kínversk kreditkort.
Virðingarleysi Kínverja fyrir einkaréttarvörðu efni er vel þekkt og þá hafa þeir svínbeygt erlend samfélagsmiðlafyrirtæki í þágu ritskoðunar og eftirlits. Oftast reyna þeir þó að loka fyrir aðgengi þeirra að kínverska markaðinum þó þeir vænti þess auðvitað að þeirra eigin netfyrirtæki geti starfað á heimsvísu.
Öryggishagsmunir í Kína umfram frjáls viðskipti
Í frétt Financial Times (sem Morgunblaðið vitnaði til í viðskiptakálfi sínum í síðustu viku) kom fram að í einkasamtölum við bandaríska kollega sína hafa kínversku embættismennirnir sagt að ef kringumstæður væru friðsamlegri væru þeir fáanlegir til að ýmist samþykkja eða ræða nánar tvo þriðju af kröfum forsetans. Ósanngjarnari eru þær nú ekki. Þeir bæta því við að þær kröfur sem eftir sitji, svo sem að leyfa erlendum fyrirtækjum að koma inn á kínverska tölvuskýjamarkaðinn, komi ekki til greina vegna þjóðaröryggishagsmuna og annarra þátta.
En þó kröfur Trump séu réttmætar þá er engin vissa að samningataktík hans gangi upp. Eins og oft áður teflir hann djarft og lætur diplómatíuna lönd og leið. Staðreyndin er sú að nú þegar eru samskipti Bandaríkjanna og Kína verri en þau hafa nokkurn tímann verið síðan Xi Jinping komst til valda árið 2012. Kergja er í málinu og ráðamenn í Bejing eru óviljugir að gefa Washington nokkuð eftir, jafnvel í málum sem væru í fullu samræmi við umbótamarkmið Kínaforseta. Það er hins vegar ekki eingöngu persóna Trump sem skiptir máli. Xi Jinping, forseti Kína, er nánast einráður og hefur verið að endurmeta hugmyndafræði kínverska Kommúnistaflokksins. Xi hafði áhyggjur af því að flokkurinn væri kominn í aukahlutverk í stefnumótun í helstu málaflokkum í landinu og því endurheimti hann stjórn flokksins yfir stofnunum ríkisins og setti pólitíska hugmyndafræði ofar stefnumótun tæknikratanna eins og Kevin Rudd, fyrrverandi forsætisráðherra Ástralíu, vakti athygli á í grein sem birtist í Morgunblaðinu ekki fyrir löngu. Daður Xi við marxisma hefur einnig valdið óróleika og heimurinn ætti ekki síður að hafa áhyggjur af afstöðu hans en Trump. Og Xi Jinping veit nánast fyrirfram hvernig kosningar fara, öfugt við Trump. Öll Suðaustur-Asía fylgist með og óttast utanríkis- og viðskiptastefnu Kína.
Í lok árs 2016 ákvað miðstjórn Kommúnistaflokksins að endurvekja gamlan sið, að flokksmenn ávarpi hver annan sem félaga (comrade), samanber félagi Maó. Allt til 1985 eða þar um bil notuðu langflestir Kínverjar ávarpið félagi en þá breyttist tískan. Maójakkar hurfu af sviðinu, vestræn tíska varð vinsæl og ráðamenn fóru að nota fína titla. En svo ákvað miðstjórnin að hverfa til fyrri siða. Xi Jinping lét boð út ganga um að hann væri félagi Xi Jinping: Kallið mig ekki forseta eða aðalritara Flokksins, heldur félaga! Hvar þessi endurskoðun endar er erfitt að segja en ástæða er til að hafa nokkrar áhyggjur af þessu.
Stoppuðu bandaríska yfirtöku
Stefna Kínverja hefur reitt bandarísku embættismennina til reiði samkvæmt áðurnefndri frétt Financial Times. Það kom þeim til dæmis mjög á óvart að kínversk samkeppnisyfirvöld skyldu ekki samþykkja 44 milljarða dala yfirtöku bandaríska fyrirtækisins Qualcomm á NXP, rétt eins og það kom Kínverjunum á óvart að Trump skyldi halda tollahækkunum til streitu. Yfirtakan var með þeim stærri og hafði vakið mikla athygli. Það var lítil skörun í starfsemi örgjörvafyrirtækjanna tveggja en að sögn fólks sem kom að málinu setti kínverska samkeppniseftirlitið skilyrði sem ómögulegt var að fullnægja, svo sem að Qualcomm, sem er með höfuðstöðvar sínar í San Diego, skyldi selja öll tæknieinkaleyfi NXP, en það myndi gera að engu eina helstu ástæðuna fyrir kaupunum.
Kínverska samkeppniseftirlitið sendi aðeins eina tilkynningu frá sér eftir að Qualcomm hætti við kaupin 25. júlí, þar sem sagði að bandaríska fyrirtækinu hefði ekki tekist að „leysa úr atriðum er varða samkeppnismál“ og lagði eftirlitið til frekari viðræður til að „finna lausn við hæfi“.
Það skal tekið fram að þau viðhorf sem birtast í þessum pistli eru eingöngu höfundar og á hans ábyrgð.