Bandarískar TikTok stjörnur sem reiða sig á innkomu sína á samfélagsmiðlinum TikTok hræðast mögulega lokun á forritinu í Bandaríkjunum. Mike Pompeo, utanríkisráðherra Bandaríkjanna, gaf það út í vikunni að Bandaríkin séu að skoða bann við kínverkum samfélagsmiðlaforritum vegna ásakana um að kínversk stjórnvöld beiti þeim til að njósna um notendur.
https://www.mbl.is/frettir/erlent/2020/07/07/bandarikin_skoda_bann_vid_tiktok/
https://www.mbl.is/frettir/taekni/2020/07/04/eydid_tiktok_nuna/
Indversk stjórnvöld hafa nú þegar bannað TikTok, sem nýtur mikilla vinsælda, vegna sjónarmiða um þjóðaröryggi og friðhelgi einkalífsins á meðan önnur lönd eru sögð íhuga svipaðar aðgerðir.
Svokallaðir áhrifavaldar á TikTok í Bandaríkjunum reiða sig margar hverjar alfarið á miðilinn til að skapa tekjur. Ef forritið verður bannað í Bandaríkjunum sjá margir fram á atvinnuleysi.
Forritið er vettvangur fyrir marga áhrifavalda að landa stórum auglýsingasamningum við hverskyns fyrirtæki sem tengjast efnisframleiðslu þeirra.
Áhrifavaldurinn Sean, sem kallar sig @seandoesmagic, segir í viðtali að hann muni verða algjörlega tekjulaus ef TikTok verður bannað. Hann er með 13,5 milljónir fylgjenda á miðlinum og fær 15-20 þúsund bandaríkjadali fyrir hverja færslu. Það eru um 2,1 til 2,8 milljón íslenskra króna á gengi dagsins í dag.
Drage Kamerman, grínisti er með 2,1 milljón fylgjendur á TikTok og fær á bilinu 7-10 þúsund bandaríkjadali fyrir hverja færslu. Hann segir að það hafi tekið hann eitt og hálft ár að ná svo miklum vinsældum á miðlinum. Ef forritið verður bannað ætlar hann að færa sig yfir á YouTube og Instagram en hefur áhyggjur af því að erlendir fylgjendur hans muni ekki finna hann jafn auðveldlega þar.
Niko Valdes, sem kallar sig @babyfaceniko, reiðir sig alfarið á tekjur sínar á TikTok. Aðal umfjöllunarefni hans á TikTok er fjölskyldan hans. Hann hræðist að geta ekki náð endum saman ef TikTok verður bannað. Hann er með 1,5 milljónir fylgjenda á TikTok og mánaðartekjur hans eru á bilinu 7-10 þúsund bandaríkjadalir eða um 980 þúsund til 1,4 milljónir íslenskra króna.