Jeffrey Gunter, fyrrverandi sendiherra Bandaríkjanna á Íslandi, hefur efnt til umfangsmikillar auglýsingaherferðar að andvirði tæplega 470 milljóna króna vegna baráttu sinnar fyrir sæti í bandarísku öldungadeildinni.
Gunter, sem var sendiherra hérlendis á meðan Donald Trump var Bandaríkjaforseti, býður sig fram fyrir hönd Repúblikanaflokksins í ríkinu Nevada.
„Það er fólk að flæða yfir landamærin okkar,” sagði Gunter, sem er húðsjúkdómalæknir, við Fox News Digital. „Börn eru að deyja úr ofneyslu á fentanyl. Það eru glæpir á götum úti. Það ríkir ringulreið víða um heim…Get ég bara setið hjá og aðhafst ekkert þrátt fyrir þá djúpu og miklu reynslu sem ég bý yfir? Svarið er alls ekki.”
Gunter ætlar sér að velta úr sessi demókratanum Jacky Rosen sem er þingmaður á sínu fyrsta kjörtímabili í öldungadeildinni. Helsti andstæðingur Gunters innan Repúblikanaflokksins er hershöfðinginn fyrrverandi Sam Brown, sem nýtur m.a. stuðnings ríkisstjóra Nevada, Joes Lombardo, að sögn The Gazette.
Verður nánasti samstarfsmaður Trumps
„Góðu fréttirnar eru þær að MAGA-hreyfingin sér í gegnum fölsku stuðningsmennina og eins og ég sagði Trump forseta í gærkvöldi þá verð ég hans nánasti samstarfsmaður á bandaríska þinginu,” sagði Gunter við Las Vegas Review Journal í síðasta mánuði.
Tími Gunters á Íslandi á árunum 2019 til 2021 einkenndist af deilum. Á meðan hann starfaði sem sendiherra á Íslandi vildi Gunter bera skotvopn, þar sem hann hafði áhyggjur af öryggi sínu hér á landi. Það fékk hann ekki að gera. Einnig var hann sakaður um ógnarstjórn af fyrrverandi samstarfsfólki sínu.