Gríðarleg úrkoma hefur gengið yfir Sameinuðu arabísku furstadæmin (SAF) og nágrannaríki þess undanfarna daga og hefur t.a.m. orðið mikil röskun á starfssemi alþjóðaflugvallarins í borginni Dúbaí, sem er fjölmennasta borg SAF.

Óveðrið olli miklum usla á þriðjudag þar sem vatn flæddi yfir vegi og hluta flugvallarins. 

Alls hafa 20 látist í skyndiflóðum í Óman og einn í SAF. 

https://www.mbl.is/frettir/erlent/2024/04/16/mikid_ovedur_vid_persafloa_og_18_latnir_i_oman/

Eitthvað hefur verið um komuflug í dag en að öðru leyti hefur starfsemi á flugvellinum í Dúbaí legið niðri. Þar er alla jafna mjög mikil umferð alla daga, að því er segir í umfjöllun breska útvarpsins.  

Langar raðir

Flugvallaryfirvöld segja að ferðaáætlanir ferðamanna hafi raskast verulega og víða séu langar raðir og bið. 

Yfirvöld í Dúbaí birtu tilkynningu á samfélagsmiðlinum X þar sem hvetja aðeins þá sem eigi staðfestar bókanir að koma á flugvöllinn. 

Ekki séð annað eins

Paul Griffiths, forstjóri flugvallarins, segir að staðan sé erfið. „Ég veit ekki til þess að nokkur hafi séð annað eins,“ sagði hann. 

Miklar umferðarteppur hafa myndast á vegum við völlinn þar sem fólk reynir að komast í flug. 

Í gær var yfir 300 flugferðum aflýst og mörg hundruð til viðbótar frestuðust. 

Úrkoman sem féll á þriðjudag í SAF er sú mesta í skráðri sögu landsins. Um 259,5 mm féllu þar sem veðurfarið er alla jafna sólríkt og þurrt. 

Ríkisfréttastofa landsins segir úrkomuna hafa verið sögulegan viðburð og ekkert hafi komist í hálfkvisti við hann frá því mælingar hófust árið 1949.