Lánakjör sem HS Orka fékk við 40 milljarða króna endurfjármögnun sína er í samræmi við fyrri kjör. Þetta segir Tómas Már Sigurðsson, forstjóri HS Orku, í samtali við mbl.is.
Fyrirtækið hefur staðið í ströngu undanfarin ár vegna jarðhræringa og eldgosa á Reykjanesskaga, sem meðal annars hafa ógnað vinnslu fyrirtækisins í Svartsengi og lögnum til Reykjanesbæjar.
Hafa lánakjörin versnað?
„Við tjáum okkur ekki um það en ég get heilt yfir sagt að við erum á mjög ásættanlegum kjörum og í samræmi við það sem við vorum áður,“ segir hann og bætir við:
„Undirliggjandi vextir hafa hækkað eins og hjá öllum en kjörin sjálf eru mjög ásættanleg.“
https://www.mbl.is/vidskipti/frettir/2024/07/09/hs_orka_lykur_40_milljarda_endurfjarmognun/
Hjálpar við endurbætur á Svartsengisvirkjun
Tómas kveðst vera sáttur með kjörin og segir að þau útskýrist meðal annars af því að HS Orka hafi haldið lánveitendum upplýstum um stöðuna.
Fjármögnunin nær til yfirstandandi stækkunar og endurbóta orkuversins í Svartsengi og er skref í átt að áformum um frekari vöxt félagsins í jarðvarma og vatnsafli.
„Við erum í endurbyggingu á Svartsengi og þetta mun hjálpa okkur við að klára það. Það er bæði endurbygging á 50 ára gamalli hitaveitu og líka fáum við betri nýtni og rafmagnsframleiðslu út úr þessu,“ segir Tómas.
Stefnt að byggingu orkuvers í Krýsuvík
Hann segir HS Orku einnig ætla í rannsóknarboranir í Krýsuvík og að bora meira á Reykjanesi og Svartsengi. Þá vilji fyrirtækið halda áfram með Hvalárvirkjun.
„En þessi fjármögnun er ekki nóg til að ganga frá því. Það nær bara í undirbúningsvinnuna sem stendur yfir.“
Í Krýsuvík verður fyrsta rannsóknarborun á árinu og stefnt er að 100 MW orkuveri á Sveifluhálsi.
https://www.mbl.is/frettir/innlent/2024/06/13/vilja_laga_virkjunina_ad_natturunni/