Við nálgumst áramót og það eru ekki bara féttamenn og ýmsir þáttastjórnendur sem líta um öxl til að meta hvernig árið hafi verið. Margir einstaklingar líta einnig um öxl og kanna hvernig þeirra ár hafi verið og hvort þeir hafi náð þeim árangri sem þeir stefndu að í upphafi árs. Hver voru markmiðin sem sett voru í upphafi árs og náðist mælanlegur árangur á einhverju sviði lífsins. Mælanlegur er lykillinn hérna, því ef við getum ekki mælt árangur í einhverju, hvort sem það eru tölur eða annar mælikvarði sem við notum, þá er það í raun ekki árangur.

Svo er að skoða markmiðin. Gáfumst við upp á þeim fljótlega eftir að þau voru sett eða héldum við okkur fast við að vinna að þeim skref fyrir skref uns þeim var náð. Ýmsir hafa væntanlega náð sínum markmiðum, aðrir ekki - því reyndin er sú að margir gefa markmiðin upp á bátinn ef þau nást ekki á skömmum tíma. Í mörgum tilvikum er það vegna þess að við byrjum að efast um að við getum gert það sem við stefnum að. Við leggjum brött af stað, en tölum okkur svo út markmiðum okkar með því að tala eða hugsa neikvætt um þau, eða það sem verra er, með því að hlusta á úrtölur annarra og fara eftir þeim.

Hafir þú ekki náð árangri með þau markmið sem þú settir þér fyrir þetta ár, eru líkur á að þér takist ekki vel til með þau sem þú setur þér fyrir næsta ár, nema því aðeins að þú skoðir hvaða hindranir í eigin huga það voru sem héldu aftur af þér. Staðfesta í hugsun og staðfesta í verki er það eina sem í raun skilar árangri. Þegar við endurtökum góða hluti, dag eftir dag, skila þeir að lokum frábærum árangri.

Áramótabrennum var eitt sinn ætlað að "brenna burt hið gamla", til að hægt væri að fara með hreinan skjöld inn í nýja árið. Kannski væri ekki úr vegi að kasta nokkrum miðum, sem á hafa verið skrifuð þau orð sem lýsa hindrunum okkar, á áramótabrennuna. Með því að losna við hindranirnar eru meiri líkur á að okkur takist að ná settu marki á nýju ári.

Á þessu ári er nýtt tungl á sjálfan nýársdag og því má segja að hann feli í sér tvöfalt upphaf. Þar sem við sköpum okkar eigið líf, ráða markmið okkar og einbeittur vilji til að ná þeim miklu um hvernig tekst til með sköpunarverkið. 

Leyfðu ímyndunaraflinu og ævintýraþránni að taka völdin þegar þú setur þér stefnu inn í árið 2014!