Margir tengja Hafnarfjall við rok og brattar skriður og er það ekki að ástæðulausu. Það eru ekki allir sem vita að fjallið hefur aðrar og jákvæðari hliðar. Hafnarfjall er nefnilega gríðarlega skemmtilegt fjall að ganga á. Leiðin upp norður hrygg fjallsins er einstaklega aðgengileg og falleg og útsýnið er ekki til að spilla fyrir. Hæsti tindurinn nefnist Gildalshnúkur og er hann nokkuð brattur en þó öllum fær.

Á laugardaginn síðasta fór ég með hóp á vegum Fjallafélagsins á Hafnarfjall. Veðrið var einstaklega gott og allir nutu göngunnar til fulls enda ekki annað hægt á svo dásamlegum degi. Þegar ekið er að sunnan er beygt til hægri inn á gamlan malarveg á móts við Mótel Venus og hefst þar gangan. Haldið er upp norður hrygg fjallsins og er þar nokkuð greinilegur göngustígur. Fallegt útsýni er yfir Borgarfjörð og niður skriðurnar í vesturhlíðum fjallsins. Gengið er upp í skarð vestan við Gildalshnúk og síðan haldið beint upp á tindinn. Þar er nokkuð bratt og laust undir fæti en ef varlega er farið er það ekki meiriháttar fyrirstaða. Hægt er að ganga niður næsta hrygg fyrir austan og fara þannig hringleið en í þetta skiptið var ákveðið að fara sömu leið niður. Gangan tekur 4 til 5 tíma. Hægt er að sjá leiðina á heimasíðunni NokiaSportsTracker.