Hér er lokakafli um ferð Þóru Hrannar Njálsdóttur og Sigurjóns Péturssonar þar sem þau hjóluðu hringinn í kringum Ísland  á fjallahjóli núna í sumar. Ótrúlegt afrek  hjá þeim en eins og ég sagði um daginn þá  hafa þau enga reynslu af hjólreiðum og þau voru að fagna sextugs afmæli Sigurjóns. Nóg til að slá mig amk út af laginu. 

Dagur 12.

Í ferðinni hjóluðum við samtals í 100 klst og 27 mínútur og heildarvegalengdin var 1367 km. Við Sigurjón brostum hringinn þegar við skáluðum fyrir hvort öðru í kampavíni heima í garði í sólskini og hita enda var "Hringnum" lokið, hvílík ævintýraferð.  Að ferðast um landið okkar á reiðhjóli er alveg sérstök upplifun.  Þar sem þú ferð hægar yfir en í bíl þá gefst miklu betra tækifæri til að að njóta náttúrunnar og maður tekur eftir ýmsu sem hingað til hafa farið fram hjá manni.  Þú ert einn með sjálfum þér og samt ekki.  Þú átt samtal við nánast hverja einustu vegstiku allan hringveginn.  Og fólkið sem þú hittir er alveg meiri háttar.  Sérstaklega er þér vel tekið þegar í ljós kemur að þú ert Íslendingur og það á reiðhjóli.  Að vissu leyti upplifir þú þig sem útlending í eigin landi.  Þér gefst mikill tími til að hugsa.  Hugsar og hugsar um allt og ekkert.  Eignast innri frið. Engin truflun bara hjólað og hjólað.