Leiðin yfir Fimmvörðuháls milli Skóga og Þórsmerkur er ein vinsælasta gönguleið landsins enda ganga hana mörg þúsund manns árlega. Það er sérkennileg tilfinning að sjá gossprungu spýta upp logandi hrauni í um eins kílómeters fjarlægð frá gönguleiðinni. Það verður fróðlegt að fylgjast með þróun mála og hvernig hún kemur undan þessum náttúruhamförum. Í nágrenninu gossprungunnar eru skálar á Fimmvörðuhálsi sem vonandi sleppa óskemmdir.
Síðustu eldgos á Íslandi hafa verið að vissu leyti "túrista-gos". Í fersku minni er gosið í Heklu árið 2000 þegar landsmenn flykktust austur til að virða gosið fyrir sér en festust síðan í hríðarbyl á bakaleiðinni. Nú er öryggisgæsla mikil og umferð mjög takmörkuð um svæðið. Það er eðlilegt enda eru eldgos óútreiknanleg og getur mikil hætta skapast á stuttum tíma.
Eldgos hafi mikið aðdráttarafl enda birtast í þeim kraftar úr iðrum jarðar sem eru okkur annars huldir. Það er því líklegt að margir leggi leið sína um Fimmvörðuháls næsta sumar til að virða nýrunnið hraunið fyrir sér. Gönguleiðin gæti því orðið enn vinsælli eftir síðustu atburði.