Eftir Ögmund Jónasson: „Athyglisvert er að fangelsanir á undanförnum misserum beinast einkum að fólki sem drýgt hefur þann glæp að hvetja til samninga og friðsamlegra lausna!“
Ögmundur Jónasson
Vaxandi spennu gætir í Tyrklandi vegna sveltimótmæla pólitískra fanga þar í landi en þeir krefjast þess að einangrun Öcalans, höfuðleiðtoga Kúrda í Tyrklandi og Norður-Sýrlandi, verði rofin og pólitískum föngum sleppt úr haldi.
Mótmælasvelti
Tölur um hve margir taki þátt í þessum sveltiaðgerðum eru nokkuð á reiki en þær eru á bilinu 150 til 250. Lægri talan vísar þá til þeirra sem eru innan fangelsismúra en sú hærri til heildarinnar. Þannig taka fjórtán stjórnmálamenn þátt í mótmælasvelti í Strassborg þar sem Mannréttindadómstóll Evrópu er staðsettur svo og þing Evrópuráðsins. Þessar stofnanir hafa sætt nokkurri gagnrýni fyrir linkind gagnvart mannréttindabrotum Tyrkja.