Körfuboltakörfur við Seljaskóla voru fjarlægðar sl. laugardag, þann 17. júní, að frumkvæði Reykjavíkurborgar, vegna kvartana íbúa í grennd við skólann yfir hávaða frá ungmennum á körfuboltavellinum. Einar Þorsteinsson, oddviti Framsóknarflokksins í Reykjavík, segir að borgarráð hafi tekið ákvörðun um að fjarlægja körfuboltakörfurnar yfir sumarið fyrir um tveimur árum, það er á síðasta kjörtímabili. Sjálfur hafi hann ekki vitað af málinu fyrr en nú. Þá kannast hvorki formaður skóla- og frístundasviðs né sviðsstjóri menningar- og íþróttasviðs Reykjavíkurborgar við það að hafa fengið málið á sitt borð.
„Ég myndi helst vilja að þessar körfur færu upp sem fyrst,“ segir Einar Þorsteinsson og bætir við að hægt ætti að vera að leysa málið í góðri samvinnu við bæði íbúana og krakka í hverfinu. Hann hafi þó skilning á því að hávaðinn valdi óþægindum. „Menn eru sumir að keyra
...