Morgunblaðið
| 14.4.2021
| 15:00
Stríðskostnaður hugverkaréttinda
Ásgeir Ingvarsson skrifar frá Mexíkóborg ai@mbl.is Loksins er komin niðurstaða í deilu Oracle og Google og lauk með því að Hæstiréttur Bandaríkjanna rýmkaði skilgreininguna á „sanngjarnri notkun“. Málið vekur upp spurningar um þann óskapnað sem umgjörðin utan um hugverkaréttindi er orðin.
Furðu sætir hve litla athygli íslenskir og erlendir fjölmiðlar veittu úrskurði Hæstaréttar Bandaríkjanna í síðustu viku, í máli Oracle gegn Google. Varð það niðurstaða Hæstaréttar, með sex atkvæðum gegn tveimur, að Google hefði verið heimilt að nota ríflega 11.000 línur af Java-forritunarkóða sem var upphaflega saminn af Sun Microsystems, sem Oracle keypti svo árið 2009. Kóðann fékk Google að láni við smíði Android-stýrikerfisins sem núna má finna í vel yfir tveimur milljörðum snjallsíma um allan heim og hafði Oracle gert sér vonir um að fá allt að níu milljarða dala í bætur fyrir meintan hugverkastuld. Áður hafði millidómstig úrskurðað Oracle í hag.