Tvö skip fá fullbúin OPTIM-ICE ísþykknikerfi

Hraðfrystihús Hellissands hefur gengið frá kaupum á tveimur fullbúnum OPTIM-ICE ísþykknikerfum frá Optimar KAPP. Kerfin hafa verið sett í skipin Örvar SH og Rifsnes SH sem eru í eigu Hraðfrystihúss Hellissands.

,,Við erum mjög ánægð að hafa gengið frá kaupum á OPTIM-ICE ísþykknikerfunum og fá þar með hámarkskælihraða fyrir skipin okkar Örvar SH og Rifsnes SH. Það er mikilvægt að kæla aflann hratt og vel fyrstu klukkustundir eftir veiði því það lengir geymsluþol verulega. OPTIM-ICE kerfin eru mjög öflug og með þessum kaupum erum við að velja gæði og rekstraröryggi. Það er stór þáttur í gæðakerfinu hjá okkur að geta útvegað viðskiptavinum okkar ferskari og betri fisk,” segir Ólafur Sigmarsson, framleiðslustjóri hjá Hraðfrystihúsi Hellissands.

Rifsnes SH. Aðsend mynd.

,,OPTIM-ICE ísþykknivélarnar eru með bestu kæliaðferðum sem fyrirfinnast á markaðnum í dag. Vélarnar hafa einstaklega hraða niðurkælingu sem fer mjög vel með hráefnið og getur skipt sköpum hvað varðar gæði á aflanum,” segir Freyr Friðriksson, eigandi Optimar KAPP, sem framleiðir OPTIM-ICE ísþykknivélarnar.

• Blogga um frétt