Síldarvinnslan verðlaunuð fyrir smekklegheit

Umhverfisviðurkenning Fjarðabyggðar var veitt í þremur flokkum síðastliðinn föstudag, og í flokki fyrirtækja varð Síldarvinnslan hlutskörpust.

Þetta kemur fram í frétt á heimasíðu Fjarðabyggðar.

Í umsögn dómnefndar kom fram um umhverfi Síldarvinnslunnar að „viðurkenningin er veitt fyrir sérlega snyrtilegt umhverfi. Ásýnd húss og vinnusvæðis er stílhreint og öll umgengni til fyrirmyndar.“

Öllum sem lögheimili eiga í Fjarðabyggð var heimilt að senda tilnefningar þegar auglýst var eftir slíku í ágúst og september síðastliðnum. Lagt var mat á þær tilnefningar sem bárust af sérstakri dómnefnd, en þar áttu sæti Freyr Ævarsson umhverfisfulltrúi Fljótsdalshéraðs, Sveinbjörn Hrafn Kristjánsson, starfsmaður áhaldahúss Fljótsdalshéraðs, og Anna Heiða Gunnarsdóttir, garðyrkjufræðingur á Reyðarfirði. 

Var það mat dómnefndar að fyrirtækið legði sjáanlega mikinn metnað í blómlega og fallega ásýnd á starfssvæði sínu, og blómakerum við höfuðstöðvar fyrirtækisins sérstaklega hampað í umsögn hennar.

• Blogga um frétt