Metsala á fiskmarkaði

Heildarsala á fiskmörkuðum hérlendis í kílóum talið í ágúst og september 2016 var sú mesta sem um getur á þessum mánuðum frá stofnun markaðanna. Þrátt fyrir þetta eru verðmæti sölunnar minni en á sama tíma 2015 vegna lækkunar á fiskverði.

Þetta kemur fram á vefsvæði Reiknistofu fiskmarkaða.

Nam söluandvirði aflans fyrstu 9 mánuði ársins samtals 21.229 milljónum króna og hefur lækkað um tæpar 300 milljónir króna fyrir sama tímabil frá fyrra ári.

Selt magn í ágúst sl. var 12.229 tonn sem er 3.296 tonnum meira en selt var í ágúst 2015 sem er næststærsti ágústmánuður frá upphafi.  Í september voru seld 10.788 tonn sem er 1.085 tonnum meira en næststærsti september sem var einnig 2015.

Fyrstu 9 mánuði ársins voru seld 92.602 sem er mesta magn á þessu tímabili frá upphafi markaðanna. Er það 10.160 tonnum meira en á sama tíma í fyrra. Næstmest var selt árið 1996 eða 92.347 tonn, en þá voru seld yfir 13 þúsund tonn af loðnu.

Mest var selt af þorski eða 39.348 tonn fyrstu 9 mánuðina sem er 4.817 tonnum meira en á sama tímabili í fyrra og það mesta frá upphafi markaðanna.

Meðalverð á þorski 9 fyrstu mánuði þessa árs er kr. 280,20 en var kr. 304,09 kr. á árinu 2015, svo lækkunin er umtalsverð.

• Blogga um frétt