Útskrift Marel-vinnslutækna frá Fisktækniskólanum

Þriðjudaginn 6. desember útskrifaðist annar árgangur Marel-vinnslutækna frá Fisktækniskóla Íslands. Það var glaðhlakkalegur hópur sem tók við prófskírteinum og minjagrip um námið í húsakynnum Marel ásamt sínum nánustu.

Það voru 8 einstaklingar sem luku námi í þessum áfanga nú á haustönn. Nemendur komu frá ýmsum stöðum á landinu svo sem Reykjavík, Vestmannaeyjum, Sauðárkróki, Akureyri og Fáskrúðsfirði. 

Námið er sniðið að þörfum fiskvinnslunnar sem sífellt verður tæknivæddari með áherslu á framleiðslugæði og hámarksnýtingu hráefnis. Mikill skortur er á fólki með ákveðna tækni-, hugbúnaðar- og vinnsluþekkingu í fiskiðnaði og svarar þetta nám kalli iðnaðarins, að því er fram kemur í fréttatilkynningu frá Fisktækniskólanum.

Grunnnám og sérhæft nám

Námið skiptist í tvær annir; grunnnám á haustönn og sérhæft nám í Marel-búnaði á vorönn. Hlutverk grunnnámsins er byggja upp bakgrunninn sem þarf til að nemendur eigi auðveldara með að tileinka sér tæknilegt efni sem kennt er nær eingöngu á Marel-tæki og hugbúnað í húsakynnum Marel. 

Kennt er í lotum þar sem farið er í ákveðna tækjaflokka, svo sem framleiðsluhugbúnað, vogir, snyrtilínur, skurðarvélar o.fl. Í lok annarinnar er farið í vinnustaðagreiningar og lagt fyrir lokaverkefni sem felst í að greina vinnsluferli valdra fiskvinnslufyrirtækja með það að markmiði að auka afköst, gæði og skilvirkni.

Að loknu námi hafa menn því haldgóða innsýn í virkni tækja og hugbúnaðar í fiskvinnslu og geta sinnt ákveðnu fyrirbyggjandi viðhaldi ásamt því að geta sett upp einfalda staðlaða vinnslulykla í helstu Marel-tækjum.

Námið gefur nemendum góða möguleika á að bæta enn frekar við sig þekkingu og þar með aukna möguleika á vinnumarkaði.  Innritun fyrir vorönn er þegar hafin hjá Fisktækniskóla Íslands en hámarksfjöldi verður takmarkaður við 9 einstaklinga.

Áhugasamir geta kynnt sér Fisktækniskólann og námsframboð hér.

• Blogga um frétt