Loðnuskortur veldur búsifjum

Heildarafli íslenskra fiskiskipa árið 2016 var 1.070.000 tonn og lækkaði um 247.000 frá fyrra ári. Samdrátturinn skýrist nær eingöngu af minni loðnuafla, en ríflega 101.000 tonn veiddist af loðnu á síðasta ári en tæp 353.000 tonn árið 2015.

Þetta kemur fram á vefsvæði Hagstofu Íslands.

Samdráttur í afla uppsjávartegunda var 32% á milli ára en alls veiddust tæp 576.000 tonn af uppsjávartegundum. Botnfiskafli nam 457.000 tonnum á síðasta ári sem er 4% aukning miðað við fyrra ár. Að venju er þorskaflinn uppistaðan í botnfiskaflanum en tæp 264.000 tonn veiddust af þorski á síðasta ári sem er 8% meira en árið 2015.

Flatfiskaflinn var svipaður á milli ára og var tæp 24 þúsund tonnum á síðasta ári. Afli skel- og krabbadýra nam 12.700 sem er jafngildir 26% aukningu miðað við árið 2015. 

Aukning á heildarafla í desembermánuði

Í desembermánuði var fiskaflinn rúm 59.000 tonn sem er 20% meiri afli en í desember 2015. Aukið aflamagn í desember skýrist af auknum uppsjávarafla, en afli uppsjávartegunda, kolmunna og síld, var 15.000 tonnum meiri en í desember 2015. Samdráttur varð hinsvegar í öðrum aflategundum, botnfiskafli dróst saman um 14%, flatfiskafli um 41% og skel- og krabbadýraafli um 28%.

Þrátt fyrir aukið aflamagn í desember má gera ráð fyrir að verðmæti aflans í desember hafi dregist saman um 5,5%, sem skýrist af aflasamdrætti verðmætari tegunda.

• Blogga um frétt