Víkingur veiddi 1.580 tonn af loðnu

Víkingur AK er á leið til Vopnafjarðar með um 1.580 tonn af loðnu sem fékkst í tveimur köstum í gærkvöldi við Tvísker, skammt vestan við Jökulsárlón á Breiðamerkursandi.

Að því er kemur fram á vef HB Granda var loðnan stór og góð. Um 60% aflans var hrygna og hún hentar því vel til frystingar.

„Við tókum tvö köst. Fengum um 1.000 tonn af loðnu í fyrra kastinu og tæp 600 tonn í því síðara. Það var mokveiði á svæðinu. Við byrjuðum við Tvísker og enduðum um þrjár mílur austan við Ingólfshöfða. Þegar við fórum af svæðinu um klukkan hálftvö í nótt var loðnan komin að Ingólfshöfða þannig að það er ferð á henni,“ sagði Albert Sveinsson, skipstjóri á Víkingi, í samtali við HB Granda.

• Blogga um frétt