Grásleppuveiðidagar verða 20

Fjöldi veiðidaga til bráðabirgða vegna hrognkelsaveiða verður 20 í ár. Þetta kemur fram í reglugerð sem gefin er út af atvinnuvega- og nýsköpunarráðuneytinu.

Reglugerð um hrognkelsisveiðar 2017

Þetta er sami fjöldi veiðidaga og áður, að því er kemur fram í tilkynningu.

Þar segir að engar breytingar séu gerðar á reglugerðinni fyrir utan að ákvæði um upphafs- og lokatíma veiða er breytt í sama horf og var 2015.

„Í byrjun árs 2016 kom Hafrannsóknastofnun fram með ráðgjöf til ráðuneytisins um að svo virtist sem skipti máli, til að draga úr meðafla, að veiðin hæfist seinna. Brugðist var við þessum ábendingum sbr. frétt á vef ráðuneytis,“ segir í tilkynningunni.

„Í bréfi Hafrannsóknastofnunar sem barst ráðuneytinu 24. mars kemur fram að reynslan af síðustu vertíð sýni ekki að þessi aðgerð hafi heppnast. Þvert á móti hefði skráður meðafli 2016 ekki verið meiri um árabil.“

Þorgerður Katrín Gunnarsdóttir, sjávarútvegs- og landbúnaðarráðherra, hvetur jafnframt grásleppuveiðimenn til að skrá allan meðafla af ýtrustu nákvæmni á næstu vertíð.

• Blogga um frétt