Of sterk króna og of stór fiskur

Meðalverð fyrir kíló af óslægðum þorski var komið í um 170 krónur á fiskmörkuðum í gær og hefur það lækkað mikið að undanförnu, enda framboð verið mikið.

Halldór Ármannsson, skipstjóri á Guðrúnu Petrínu GK og fyrrverandi formaður Landssambands smábátaeigenda, segir að krónan sé of sterk og minna komi þess vegna í hlut sjómanna og útflytjenda.

„Verstöðin Ísland er að gera góða hluti í heildina, nóg að gera í ferðaþjónustu og loðnuvertíð er sterk eftir allt saman. Á meðan styrkist krónan og aflinn skilar færri krónum til okkar. Núna er hrygningarfiskur að ganga og það er rosalega mikið af stórum fiski. Ég vil ekki segja að stóri fiskurinn sé vandamál, en við fáum skásta verðið fyrir það sem er flutt út ferskt og þeir kaupendur vilja ekki stærsta fiskinn,“ segir Halldór.