Verðlauna einstakt hugrekki til sjós

Alþjóðasiglingamálastofnunin leitar nú eftir tilnefningum til verðlauna fyrir einstakt hugrekki til sjós. Verðlaunin hafa verið veitt árlega frá árinu 2007 og mega þjóðir eða samtök tilnefna einstakling eða hóp til verðlaunanna.

Þetta kemur fram á vef Samgöngustofu.

Segir þar að stofan leiti að tilnefningum um aðila sem sýnt hafi einstakt hugrekki til sjós, en umrætt atvik skuli hafa átt sér stað á tímabilinu 1. mars 2016 til 28. febrúar 2017.

„Í fyrra voru verðlaunin veitt skipstjóranum Radhika Menon en hún var skipstjóri á olíuskipinu Sampurna Swarajya. Hún var tilnefnd af indverskum stjórnvöldum fyrir einstakt hugrekki við björgun sjö sjómanna af fiskibátnum Durgamma,“ segir enn fremur á vef stofunnar.

„Báturinn var að sökkva eftir að hafa verið á reki í sex daga, í roki og rigningu, þar sem vindhraði var 30 til 40 m/s og ölduhæð náði 8 til 10 metrum við björgunina.“

Tilnefningar skuli þá sendar Samgöngustofu eigi síðar en föstudaginn 7. apríl 2017, á netfangið halldorz@icetra.is.

Sjá meira um verðlaunin.

• Blogga um frétt